ŞAM KİMİ YANASAN YANANDA GƏRƏK

Böyük  rus şairi Aleksandr  Blokun müdrik bir kəlamı  ona da başqa həmfikirləri kimi  həyatını düzgün qurmağa  kömək edib.  Klassik  rus ədəbiyyatının banilərindən biri olan  şair öz dövründə insanların sosial  durumlarını, mənəvi  dünyalarının  çalarlarını, bu ali  varlığın cəmiyyətə verdiyi  faydanı təhlil edərək
 deyib:- İnsan həyatı mahiyyətinə və mənəvi potensialına görə  iki bir-birinə zidd olan qütblərə bölünür;  çürüməkdə olanlar  və yanmaqda davam edənlər.Qorxaqları və yaltaqları şair  çürüməkdə olanlanlar qrupuna aid edir, mərd və cəsarətli insanları isə  yananlar qrupuna. Bu məqamda  mərhum  xalq  şairimiz  Bəxtiyar  Vahabzadənin də müdrik bir kəlamının  poetik düşüncə  məhsulu  olan ibrətamiz misralarını xatırlamamaq mümkün deyil:
                                             Yaşamaq yanmaqdır, yanasan gərək,
                                             Həyatın mənası yalnız ondadır.
                                             Şam əgər yanmırsa, yaşamır demək,
                                             Onun da həyatı yanmağındadır.
        İnsan ömrünün mahiyyətini düzgün dəyərləndirməyi  bacaran  klassiklərimizin, ictimai  və siyasi  xadimlərimizin bu kimi  ibrətamiz fikirləri  zaman-zaman  tarixin,həmin tarixi yaşadan insanların həyat simvolu olaraq  bu  gün də  cəmiyyətdə  tarazlıq meyarı kimi dəyərləndirilir.
      Bəzi insanlar, xüsusilə zamanımızda  həyatın mənasını yalnız tezliklə varlanmaqda, pul-para sahibi olmaqda görürlər. Belələri  asan yolla varlanmağın  bütün  reyazi və həndəsi üsullarını göz qırpımında mənimsəməklə qaz vurub, qazan doldururlar.Yox-yox, heç kim  bu qənaətdə olmasın ki, mən varlanmağın, mal-mülk sahibi olmağın  qəti əleyhinəyəm, yaxud  bütün  varlı adamları insanlığa yad  ünsürlər kimi  təqdim  etmək  niyyətindəyəm. Onda  Hacı  Zeynalabdin Tağıyevin və  onun sələfləri olan  tarixi şəxsiyyətlərin -məşhur   neft maqnatlarının  müqəddəs  ruhları məni qınayar.Amma etiraf edək ki, bir çox  hallarda insanlar varlandıqca  mənəviyyatca  kasıblaşır,dövrün, zamanın lənətlənmiş məxluqlarına çevrilirlər. Ruhu pak, təmiz olanlar  isə sadə insan ömrü  yaşasalar da ömürləri boyu   xeyirxah əməllərə sahib olmaqla  yüzlərlə  ehtiyac sahibinin sevgisini, məhəbbətini qazanırlar.Onlar Aleksandr Blokun varlı adamlar qrupuna  aid etdikləri deyil, Bəxtiyar  Vahabzadənin ömürlərini şam kimi əritməklə zülmətlərə nur  saçmağa qadir olanlardır. Xoş o  günə ki, zamanımız mənəviyyatca varlı insanlardan xali deyil, xoş o günə ki, cəmiyyətimiz bu qəbildən olan varlıları daha çox sevir, onlara daha çox arxalanır.
      ...  Mən onu nə  vaxtsa yazdığım bir məqalədə  Maksim Qorkinin “Danko”suna da  bənzətmişdim.Bu sadə, xeyirxah, vətəninə, xalqına, dövlətinə və onun  rəhbərinə sədaqətlə xidmət edən  DÜNYA AZƏRBAYCANLILARI MƏDƏNİYYƏT MƏRKƏZİ İCTİMAİ  BİRLİYİNİN  PREZİDENTİ RASİM MƏMMƏDOVDUR.

  VALEH MİRZƏ